Казан һәм Түбән Кама аэропортлары рейсларны кабул итми. Росавиация телеграм-каналында «һава аланы, очышларның иминлеген тәэмин итәр өчен, рейсларны җибәрү һәм кабул итүдән туктады» диелгән.
Мәскәү, Омск, Чиләбе, Төркия, Мисырга рейслар 2-3 сәгатькә тоткарланган. Түбән Камада Мәскәү рейсының вакыты чигерелгән. Чиләбедән Казанга очып килгән самолет, аэропортка утырмыйча, Казан тирәли әйләнеп очып йөри, дип яза «БИЗНЕС Online».
08.40 сәгатьтә Омскидан, Хургада һәм Чиләбедән очып килгән рейслар Самара һәм Бегиш аэропортына җибәрелгән.
Казан аэропорты соңгы тапкыр 10 сентябрьдә ябылып алган иде. Аңа кадәр – 28 августта, анда һава аланы 5 сәгать ярым рейслар кабул итмәде. Ул көнне Киров өлкәсенә дроннар һөҗүме булуы ачыкланды. 31 майда да Казан аэропорты ябылып алды.