Казанда яшәүче популяр блогер, «Ак Барс» матчларын алып баручы, «Аляска» буларак танылган Алия Мәһдиева-Рәҗәпова әбисе белән кызыклы видеолар төшерә. Бу юлы ул өлкән яшьтәге әбисен токмач җәйгәндә сөйләштергән.
– Токмач кисә белмичә кияүгә чыгарга ярамый...
– Аны сатып алырга була бит.
– Хәзер сатып алырга була, элек юк иде. Кибетнеке тәмле дә түгел ул, минеке тәмлерәк.
– Авыр бит, вакыт кирәк бит аңа.
– Өлгерә идек. Эшкә дә бара идек, токмач та җәя идек. Үзенә күрә бер мавыгу, рәхәтлек, акча да түлисе юк. Мин токмач җәйгән саен кил дә карап тор. Җәеп кара. Ирең аңа бик риза була инде. Сез ялкауланасыз. Сезгә сатып кына алырга булсын. Син токмач җәя һәм кисә белергә тиеш. Татар хатыны уңган булырга тиеш. Шул телефонда утырасыз. Бер бала бер эш белми. Кайталар да кунакка, шул телефонда утыралар. «Хәлең ничек? Нәрсә эшләргә?» – дип тә сорамыйлар. Тьфү, ябыштырттың сөйләштереп...
– Мин гаеплеме?
– Әйе инде, син сөйләштерәсең бит!
