Казахстанда массакүләм протестлар нәтиҗәсендә хөкүмәт отставкага китте
Газ ягулыгы бәясенең ике тапкыр артуы нәтиҗәсендә 2 гыйнварда Жанаозен шәһәрендә башланган протестлар бөтен илдә сәяси протестларга әйләнде.
Казахстан президенты Касым-Жомарт Токаев хөкүмәтне отставкага җибәрү турында карарга кул куйды. Премьер вазифаларын беренче вице-премьер Алихан Смаилов башкарачак. Кабминның яңа составы сайланганчы элекке хөкүмәт вакытлыча вазифаларын башкаруын дәвам итә. 2019 елның февраленнән хөкүмәт рәисе Аскар Мамин иде.
Президент ярдәмчесе Ерлан Каринны яңа дәүләт секретаре итеп билгеләде. Элек бу вазифада Крымбек Кушербаев иде. Дәүләт секретаре эчке һәм тышкы сәясәт өчен җаваплы.
1 гыйнварда газга бәяләр ике тапкыр арту аркасында Жанаозена һәм Актау халкы митингларга чыкты. Халык дәгъвасын кабул итеп, бәяләрне кире үз хәленә төшерү турында карар да кабул ителде. Әмма протест бөтен илгә җәелде - халык полиция белән сугыша, полиция машиналарын яндыра, хөкүмәтне отставкага, элекке президент Назарбаевны сәясәттән куа.
Токаев бәяләрне элекке хәленә кайтару турында карар кабул итте. (Элек безнең акча белән 9 сум тирәсе, күтәрелгән, 20 тирәсе, әмма Казахстанда хезмәт хакы күләме азрак).
Президент Касым-Жомарт Токаев халыкка мөрәҗәгать белән чыкты, кайбер өлкәләрдә комендант сәгате кертелде.
Алматыда халык акимат - җирле хакимияткә бәреп кергән. Илнең кайбер төбәкләрендә полиция халык ягына чыга.