Казага калган намазны ничек укырга?
Намаз – мөэмин мөселман үтәргә тиешле фарыз гамәл, аны вакытында укый алмасагыз, каза калдырып укыгыз.
Татарстанның беренче Баш казые Габделхак хәзрәт Саматов «Баш казый хөкемнәре» китабында әлеге сорауга түбәндәгечә җавап биргән:
«Фарыз намазларны укыр өчен ир кешегә азан әйтү һәм камәт төшерү сөннәт. Әгәр бер кеше бер көнлек калган намазларын укырга ниятли икән, бер көнлек намазга азан әйтә һәм камәт әйтә дә иртәнге намазны укый, сәлам бирә дә торып камәт әйтеп, ниятләп, өйлә намазының фарызын укый, сәлам бирә дә торып камәт әйтеп, ниятләп, икенде намазын укый, сәлам бирә дә торып камәт әйтеп, ниятләп ахшам намазының фарызын укый, сәлам бирә дә торып камәт әйтеп, ниятләп ястү намазын укый. Ахырдан тәсбих әйтеп (анысы үз ихтыяры), дога укып тәмамлый. Кыскасы, 1 көнлек калган намазда 1 азан, 5 камәт укыла. Ә көнлек намазны үз вакытында үтәгәндә һәркайсына азан, камәт тиешле».