"Каз тәпие" печеньесы
Саба районында яшәүче Исмегөл ападан "Каз тәпие" печеньесы рецептын тәкъдим итәбез.
Камыр өчен: 100 г атланмай, 300 г эремчек, 0,5 стакан шикәр комы, ванилин, тоз, 1,5 стакан чамасы он.
Бүлмә температурасында йомшарган атланмай, эремчек, шикәр комы, тоз, ванилинны салып, яхшылап болгатырга. Он өстәп, йомшак камыр басарга. Кунада камыр җәяргә, өстенә шикәр комы сибеп уклау белән тәгәрәтеп алырга. Аннары стакан ярдәмендә түгәрәкләр кисәргә. Һәр түгәрәкне урталай бөкләргә, өстенә шикәр комы сибәргә һәм тагын бер тапкыр бөкләргә. Почмакланып калган өлешенә йомшак кына итеп басып алырга. Урта җиреннән ике ягыннан пычак белән кисеп җибәрергә, нәкъ каз тәпие формасын ала.
Табаны майларга, "Каз тәпие" печеньеларын төзәргә һәм духовкада 15-20 минут пешерергә.
"Бу печенье миңа бернинди сода, аш серкәсе кебек нәрсәләр булмавы белән ошый. Сезгә дә ошар дип уйлыйм", - дип язган Исмегөл ханым.