Казанда якынча 1 атнага «Миллениум» күпере терәкләрен ремонтлауны туктатачаклар. Пауза карлыгачларның ояларын саклап калу өчен кирәк, дип сөйләделәр Казансу үсеше стратегиясенең «Телеграм»дагы каналында.
Ремонт эшләренең туктатылуы «Урам» экстрим-паркы ягыннан алып барылган эшләргә кагылачак. Каналда аңлатуларынча, чара җирле экологлар һәм активистлар үтенече буенча кабул ителгән.
Белгечләр карлыгачларның еш кына күпер очында һәм терәкләр белән тоташкан урыннарда урнашуына игътибар итте. Бу кошларның биеклекне яратуы, шулай ук әлеге урыннарның ояны һәм кошның балаларын җил һәм ерткычлардан саклау өчен уңайлы булуы белән бәйләп аңлаттылар.
