Татарстанның Чистай районындагы Каргалы авылында яшәүче 27 яшьлек ир-ат мошенникларга 1,5 миллион сумнан артык акча күчергән. Бу хакта Татарстан Республикасы Эчке эшләр министрлыгына сылтама белән «Татар-информ» хәбәр итә.
Хокук саклау органнары мәгълүматлары буенча, авыл кешесе автомобиль сатып алырга теләгән һәм мессенджерда үзенә бик отышлы булып күренгән тәкъдим тапкан.
Ул сатучы белән элемтәгә кергән, сатып алу-сату килешүе төзегән. Аннан соң автомобильне таможня аша рәсмиләштерү өчен 579 мең сум, ә машинаның үзе өчен тагын 980 мең сум акча күчергән.
Нәтиҗәдә ир-ат автомобильне дә ала алмаган, акчасын да югалткан.
Әлеге факт буенча аеруча зур күләмдә мошенниклык кылу маддәсе нигезендә җинаять эше кузгатылган.