Күпчелек җиләк-җимешләр һәм җиләкләрдәге төшләр ашарга яраксыз – һәм бу юкка түгел. Гадәттә, алар эшкәртелми, шуңа күрә организм аннан бернинди микроэлемент та алмый. Карбыз төшләре дә искәрмә түгел. Әмма алар зыянлы яки куркыныч булырга мөмкинме? Бу турыда «Роскачество» сайтында язалар.
Гастроэнтеролог табиб, ашказаны-эчәклек тракты сәламәтлеге турында блог авторы Александр Приказчиков:
Әгәр кеше берничә карбыз төшен йотса, әлбәттә, куркыныч булмаска тиеш. Теориядә, төшләр эчәклек тыгылуына китерергә мөмкин, әмма моның өчен 1 стакан төш ашарга кирәк булыр иде, һәм шул очракта да нәтиҗәсе булмаска мөмкин. Әгәр ашказаны-эчәклек авырулары булса, куркыныч бераз арта.
Әгәр берничә генә төш йотсаң, алар табигый юл белән чыга. Үзләре эшкәртелми, чөнки ашказанында аларның каты кабыгын эретә торган ферментлар юк. Шунлыктан организм бернинди файдалы матдә дә алмый.
Бик аз күләмдә генә В төркемендәге витаминнар яки майлы кислоталар алырга мөмкин, әмма моның өчен төшләрне ватып ашарга кирәк.
Аерым шуны да билгеләп үтәргә кирәк: карбызны төшләре белән ашаганда тыгылу куркынычы бар. Әгәр даими рәвештә төшләрне чәйнәп ашасаң, ул тешләргә дә зыян китерергә мөмкин (ләкин, әлбәттә, карбызны елга берничә тапкыр гына ашасаң, бернәрсә дә булмаячак).
Карбыз төшләре аппендицит китереп чыгарырга мөмкинме?
Аппендицит төшләр аркасында килеп чыга, дигән сүз – миф. Аны ризык та, төшләр дә китереп чыгармый, – дип аңлата табиб.
Бүгенге көндә медицинада аппендиксның ни өчен ялкынсынуы төгәл генә аңлатылмаган. Сәбәбе – инфекцияләр, генетик сәбәпләр, җәрәхәтләр яки төрле факторларның туры килүе булырга мөмкин.
Шуңа күрә, әгәр карбызны төшләре белән ашарга яраткан, яки көнбагышны кабыгы белән кимергән кеше аппендикс ялкынсынуы белән хастаханәгә эләксә, бу – йә туры килү, йә факторларның җыелмасы гына, ди табиб.