Карабодайны ничек дөрес итеп пешерәләр?

Табиб-диетолог Светлана Фус сүзләренчә, карабодай файдалы булсын өчен, аны дөрес итеп пешерергә кирәк. Карабодай пешергәндә суның күләмен карап торыгыз. Ярма пешә торган суда файдалы матдәләр күп була. Бу турыда «Российская газета» яза.

«Шуңа күрә пешергәндә суның микъдарын алдан ук дөрес итеп үлчәп салырга кирәк. Артык суны түгеп әрәм итмәс өчен. Идеаль пропорция — 1:2,5 (1 өлеш карабодай ярмасы һәм 2,5 өлеш су)», — ди Светлана Фус.

Карабодай ярмасы яратучыларга диетолог аны хайван аксымы белән кушып ашарга киңәш итә. «Бу сөтле карабодай боткасы, йомыркалы карабодай боткасы, кош ите белән ботка, хәтта эремчек белән карабодай боткасы», — ди ул.

Мондый комбинацияләр ашауны балансланган һәм файдалы итә.

Фус сүзләренчә, пешерер алдыннан ярманы суда җебетергә кирәк. Аннары сыеклыкны түгеп, чиста суда пешереп бетерергә.

Диетолог, медицина фәннәре докторы, профессор Алексей Ковальков исә карабодайны көн саен ашамаска киңәш итә. Атнасына өч тапкыр ашау җитә, ди ул. Шулай ук бу табиб карабодайны пешермичә генә ашау файдалы булуын искәртә. Моның өчен карабодай ярмасына су яки кефир салып, төнгә калдырыгыз. Нәтиҗәдә ярма каты булып кала, таралмый, организм өчен дә файдалырак була, диелә хәбәрдә.