Камилә Вәлиева Татьяна Тарасованы елаткан
Камилә рекордлар аның өчен гадәти күренешкә әверелмәвен әйтте.
Таллинда фигуралы шуу буенча Европа чемпионатында «фантастик чыгыш белән» Камилә Вәлиева атказанган тренер Татьяна Тарасованы елаткан. Бу турыда РИА Новости хәбәр итте.
Камилә кыска программада 90,45 балл җыеп, хаталар ясамыйча чыгыш ясап, чираттагы дөнья рекордын куйды.
«Камилә бүген гениаль чыгыш, шаккаткыч элементлар күрсәтте. Күз яшьләре чыгарлык булды, тагын да яхшырак булмастыр», — дип сөйли Тарасова.
Камилә үзе исә рекордлар аның өчен гадәти күренешкә әверелмәвен әйтте. «Бу баллар минем көн саен эшләвем юкка булмавын, яхшыруымны күрсәтә», — ди ул.
