видеодан скриншот
Камчатка краенда җир тетрәү – төбәктәге күзәтүләр башланганнан бирле иң көчлесе, – дип белдерде Камчатка губернаторы Владимир Солодов үзенең Telegram-каналында. Бу турыда РИА Новости яза.
«Бу – инструменталь күзәтүләр дәверендә иң көчле җир тетрәү, магнитудасы 8,8 тәшкил итте. Афтершоклар (кабаттан җир тетрәүләр) давамлы һәм даими булыр дип фаразлана», – дип язды ул.
Солодов халыкка тыныч булырга, паникага бирелмәскә чакырды. Ул оператив хезмәтләрнең көчәйтелгән режимда эшләвен белдерде һәм халыкны бары тик рәсми мәгълүмат чыганакларына ышанырга өндәде.
Бәла-каза турында билгеле булган мәгълүматлар:
- Җир тетрәү Камчатка ярымутравы ярларында булган, ул 1952 елдан бирле теркәлгән иң көчлесе булып санала.
- Гидрометеорология һәм әйләнә-тирә мохитне күзәтү идарәсе 4 метр биеклегендәге цунами дулкынын теркәгән.
- Төньяк Курил шәһәрен су баскан, анда гадәттән тыш хәл режимы кертелгән.
- Ярымутраудагы бер балалар бакчасында стена җимерелгән. Бина эчендә кеше булмаган.
- Камчатка Сәламәтлек саклау министрлыгы мәгълүматы буенча, зыян күрүчеләр бар, әмма барысының да хәле канәгатьләнерлек, авыр җәрәхәтләр юк.
- Бер ай дәвамында кабат җир тетрәүләр (афтершоклар) булу ихтималы бар, аларның магнитудасы 7,5кә кадәр җитәргә мөмкин.
- Камчаткада инде 2-5 балл көчендә 30 җир тетрәү теркәлгән.
- Цунами куркынычы Япониянең бөтен көнчыгыш яр буйларында диярлек, шулай ук АКШның Аляска, Калифорния һәм Орегон штатларына да игълан ителгән.
