Камал театрының иң яхшы спектакльләрен онлайн карап була
19 марттан Камал театры тамашачыларга спектакльләрне онлайн күрсәтә башлый.
Хәзер Камал театрының иң яхшы спектакльләрен онлайн карау мөмкинлеге барлыкка килде. Бу хакта театрның Фейсбуктагы аккаунтында хәбәр иттеләр.
«Кадерле дуслар! 2020 елның 19 мартыннан, Камал театры тамашачыларга ишекләрен ябу сәбәпле, без спектакльләрне онлайн күрсәтергә булдык. Бүгеннән башлап, иң яхшы татар спектакльләрен театрның рәсми ютуб-каналыннан карарга мөмкин. Архивтагы легендар спектакльләр бушка күрсәтелә. Видео-коллекция тулыланып торачак. Сайтта һәм социаль челтәрләрдәге яңалыкларны күзәтеп барыгыз», — диелә хәбәрдә.
Камал театрының ютуб каналында «Ахырзаман», «Кара чикмән», «Үлеп яратты», «Йөзек кашы, «Мулла», «Галиябану» спектакльләрен карарга була.