Камал театры актрисасы Гөлчәчәк Гайфетдинова белән тормыш иптәше Сәйдәш Биктаһиров өченче тапкыр әти-әни булган. Ике кыз тәрбияләүче гаиләдә көтеп алынган малай дөньяга аваз салган. Бу хакта Камал театрының матбугат хезмәте хәбәр итә.
«Улыгыз сәламәт, бәхетле, акыллы булып үссен! Гаиләгезгә сәламәтлек, бәхет, иминлек, балагызны тәрбияләүдә сабырлык, бары тик рәхәт мәшәкатьләр, куаныч-сөенечләр телибез», – диелә театр сайтындагы котлау текстында.
Гөлчәчәк Гайфетдинованың ире Сәйдәш – Татарстанның халык артисты Искәндәр Биктаһировның улы. Җырчы да социаль челтәрдәге сәхифәсендә шатлыгы белән белән бүлешеп: «Өченче тапкыр бабай булдым бит, җәмәгать!» – дип язып куйган.
Биктаһировлар гаиләсен уллары туу белән чын күңелдән котлыйбыз!
Фото: © Искәндәр Биктаһировның социаль челтәрдәге сәхифәсеннән
