Калкансыман биздә яман шеш ник килеп чыга?

Австралия галимнәре калкансыман биздә яман шеш килеп чыгу сәбәпләрен өйрәнгән. 370 мең кешене тикшергәннәр. Бу турыда РЕН ТВ яза.

Белгечләр кешенең масса индексы һәм яман шеш барлыкка килү, аннан үлү куркынычы арасында бәйлелекне тикшергән. Алар Австралиядә симерү проблемасының актуальлеген дә өйрәнгән. Шулай ук кешенең артык авырлыгы һәм киләчәктә калкансыман биздә яман шеш килеп чыгу куркынычы арасында бәйләнеш эзләгән.

Тикшеренү нәтиҗәләре буенча, симерү — калкансыман биздә яман шеш барлыкка килү куркынычы тудыра торган төп факторларның берсе. Артык авырлык ир-атларда биш очракның икесендә, хатын-кызларда ун очракның берсендә яман шешнең әлеге төре барлыкка килү сәбәбе булган. 

Ионлашкан нурланыш, йод җитешмәү, кайсыбер генетик факторлар, гаилә анамнезы да калкансыман биздә яман шеш барлыкка килү куркынычы тудыра, ди белгечләр.

Алар калкансыман биздә яман шешне башлангыч стадияләрдә ачыклау шактый катлаулы булуын искәртә. Бу билгеләр арасында бугаз янында кечкенә генә шеш, муенда лимфа төеннәре шешү (әгәр шеш озак бетмәсә, алар тотканда каты булып тоела), тавыш карлыгу, йоту кыенлашу, авырлык белән яки хырылдап сулыш алу, диелә хәбәрдә.