Башкортстанның Стәрлетамак шәһәрендә 33 яшьлек ир-атка карата җинаять эше ачылган. Бу турыда «Башинформ» яза.
Әлеге кеше 25 майда танышлары – 40 яшьлек ир-ат һәм 49 яшьлек хатын-кыз белән табын корып утыра. Аннары алар талаша башлый. Ул танышларына кайчы белән бик күп тапкыр суга. Ир дә, хатын да урында ук үлә.
Стәрлетамакта яшәүче 33 яшьлек ир-ат 2022 елда гына төрмәдән чыккан. Ул «алдан уйлап сәламәтлеккә авыр зыян китерү һәм саксызлык аркасында үтерү» өчен хөкем ителгән булган.
Тоткарланган ир-ат белән тикшерү эшләре бара, диелә хәбәрдә.
