Теш имплантлары һәм күперсыман протезлары булган кешеләргә авыз куышлыгында барып җитү кыен булган урыннарны яхшылап чистарту өчен ирригатор куллану файдалы. Бу турыда «Радио 1» яза.
Россия Сәламәтлек саклау министрлыгының Кемерово дәүләт медицина университетының терапевтик стоматология кафедрасы мөдире, медицина фәннәре докторы, профессор Елена Те сүзләренчә, ирригатор шулай ук пародонталь кесәләрне чистартырга ярдәм итә. Моннан тыш, брекет-системалар йөрткәндә дә авыз куышлыгы гигиенасын шактый җиңеләйтә, чөнки андый шартларда тешләрне чиста тоту катлаулы.
Шул ук вакытта профессор ассызыклаганча, тешләре сәламәт һәм теш аралары нормаль булган кешеләр өчен ирригатор мәҗбүри гигиена чарасы түгел. Ул кариес китереп чыгаручы теш куныгын бетерә алмый, ә төп вазифасы – ашаганнан соң ризык калдыкларын юып төшерү.
Ирригатор авыз куышлыгы өчен файдалы өстәмә чара булып тора, әмма ул тешләрне гадәти чистартуны алыштырмый, ә бары тик тулыландыра, диелә хәбәрдә.