Инстаграм хуҗасы: «Челтәр балалар өчен ябыла, олылар өчен чикләүләр кертелә» | intertat.tatar

Инстаграм хуҗасы: «Челтәр балалар өчен ябыла, олылар өчен чикләүләр кертелә»

Инстаграм социаль челтәре 13 яшьтән кечерәкләрне кертмәячәк.

Инстаграм социаль челтәре башлыгы Адам Моссери АКШ конгрессында чыгыш ясады. Аны бирегә социаль челтәрнең балалар психикасына начар йогынтысы турындагы җәнҗаллы эш буенча чакырганнар. Ул киләчәктә инстаграмга 13 яшьтән кечерәкләрне кертмәүләрен, олылар исә челтәрдә калган балигъ булмаганнар белән аралаша алмаячагын әйтте. Бу турыда РЕН ТВ хәбәр итте.

«Без яңа технология, яңа алгоритмнар ясыйбыз. Алар 13 яшьтән кечерәкләрнең хисап язмаларын табып, бетерергә ярдәм итәчәк. 18дән кечерәк һәм 18дән олыраклар өчен Инстаграмның яңа версиясен ясарга җыенабыз», — ди Адам Моссери.

Ләкин бу планнарны тормышка ашыру шактый кыен булачак. Мәсәлән, кеше аккаунт ясаганда, аңа ничә яшь икәнен тикшерү алымы әлегә билгеле түгел, диелә хәбәрдә.