«Кабереңнән тартып чыгарам». Каенсеңел мәрхүмә киленне кабердән казып алуны таләп итә

Чаллыда яшәүче хатын мәрхүмә киленен эксгумацияләүне (кабереннән казып алуны) таләп итеп, судка гариза язган. Өстәвенә, ул мораль зыян өчен компенсация дә сорый. «Кабереңнән тартып чыгарам: Чаллыда яшәүче хатын мәрхүмә киленне эксгумацияләүне таләп итә» дигән язма kazanfirst.ru сайтында чыкты.

«Суд да дело» газетасына сылтама белән хәбәр ителгәнчә, абыйлы-сеңелле туганнарның атасы үлә, аннары анасы да вафат була. Ата белән ананы янәшә җирлиләр. Аннары абый кешенең, ягъни атасы белән анасы үлгән ир-атның, хатыны да вафат була. Киленне дә ата белән ана янына җирлиләр.

Тол калган ир-атның сеңлесе, ягъни каенсеңел судка мөрәҗәгать итә. Ул анасы белән килен арасында мөнәсәбәтләр начар булуын әйтә. Имеш, киленне кайнана янына җирләгәндә санитария нормалары да үтәлмәгән. Ул эксгумация һәм мәетне башка урынга җирләү эшләрен абыйсына һәм башкарма комитетка йөкләүне сорый. Моннан тыш, бу хатын үзенә мораль зыян өчен компенсация дә түләнергә тиеш дип саный.

Суд киленне эксгумацияләү таләбен дә, мораль зыян өчен компенсация таләбен дә кире кага, киленне җирләгәндә кагыйдә бозулар булмавын белдерә. Үзара начар мөнәсәбәтләр моңа сәбәп була алмый, диелә хәбәрдә.