Чәй янына кабаклы-җимешле бәлеш рецептын тәкъдим итәм. Аңа гөбәдиядәге ингредиентлар салына, бары тик җимешләр төрлелеге һәм кабак белән генә аерылып тора.
Бәлеш төче камырдан тәмле була, шулай ук ачы камырдан да ясарга мөмкин.
Эчлек өчен ингредиентлар табаның зурлыгына карап алына. Шулай итеп, корт (тура, кызыл эремчек), кабак, дөге, күрәгә, караҗимеш, йөзем, атланмай, шикәр комы, тоз кирәк була.
Кабакны уртача зурлыкта шакмаклап турарга, дөгене бүрттереп алырга. Барлык ингредиентларны бергә салып болгатырга, тоз һәм шикәр комы салырга, азрак үсемлек мае өстәп, яхшылап болгатырга.
Бәлешне җыябыз: табага камыр җәяргә, аннары корт, атланмай турап салырга, шикәр комы сибәргә. Калган ингредиентлардан торган эчлекне салырга һәм, өстен камыр белән каплап, читләрен бөгеп куярга.
Бәлешне духовкада өсте кызарганчы пешерергә. Әзер бәлешнең капкачын ачарга һәм, мул итеп, эретелгән атланмай салырга.
Тәмле булсын!
