Кабак, кишер, ташкабаклар: Шәкүр бабай боулингның авыл версиясен тәкъдим итә
Блогер ишегалдында фанердан боулинг юлы, ә кабактан шар ясап куйган.
Блогер Шәкүр бабай үзенең Инстаграм сәхифәсендә боулингның авылча версиясен тәкъдим итте.
«Бөтен күңел ачу чараларын ябарга, диләр. Мин ачарга булдым әле. Бакчада күңел ачу ясыйм хәзер. Махсус аяк киеме кирәк, алайса таеп китүем бар», — дип аягына кәлүш киеп боулинг уйнап күрсәтте ул.
Шәкүр бабай ишегалдында фанердан махсус боулинг юлы җәеп куйган. Кегльләр дә үзенчәлекле: ташкабак һәм кишерләр. Ә боулинг шары урынына - өч тишек тишелгән кабаклар.
«Аның каравы, бушлай. Аяк ите ашап, машинага ягулык салып, керү өчен түләп йөрисе юк. Экономияле авыл боулингы», — дип язалар видео астында Шәкүр бабайның виртуаль дуслары.