Җырчы Илүсә Хуҗина ВКонтактедагы сәхифәсенә кызыклы видео куйды. Кадрларда җырчы, ап-ак күлмәкләрен киеп, ап-ак кәҗәне сава. Кәҗә махсус пьедесталда басып тора. Фон булып классик музыка уйный.
«Кәҗә кәҗәне сава, әле җырлый да. Бу музыканы мин өстәмәдем, бу гаҗәеп каҗәләр классик музыка тыңлый», – дип яза ул.
Аннар Илүсә үзе дә җырлый. Ул Әхмәт Ерикәй сүзләренә Салих Сәйдәшев язган «Бибисара» җырының бер куплетын суза.
Чүт-чүт сайрый сандугачлар.
Җәйге таң сызылып бара;
Таң атканда Бибисара
Йоклый алмый бичара.
Композитор Эльмир Низамов: «Нинди матур кәҗәләр», – дип язган. Илүсә аңа җавап биргән: «Эльмир, бик музыкаль кәҗәләр, дип өстәр идем әле», – ди ул.
