«Көтелмәгән кунак»: Зәйдә бер хатынның фатирына чит ир-ат ватып кереп, дүрт ай яшәгән
46 яшьлек ир-ат алдагы ярты елын төзәтү эшләрендә үткәрәчәк.
Зәй шәһәрендә бер ир-ат чит кеше фатирының йозагын ватып ачкан. Ул бу фатирга кереп урнашкан һәм дүрт ай шунда яшәгән. Бу турыда «Татар-информ» агентлыгы хәбәр итте.
Ноябрь аенда фатир хуҗасы өенә кайткан һәм көтелмәгән кунакка тап булган. Хуҗабикә хатын шунда ук полициягә хәбәр иткән.
Ир-ат үз гаебен тулысынча таныган.
Суд карары белән бу кешене ярты елга төзәтү эшләренә хөкем иткәннәр. Ул эшләгән хезмәт хакының биш процентын дәүләт хисабына тотып калачаклар.
