Күрше төбәктә өч сабый бала янып үлгән - видео

Башкортстанның Туймазы районының Кандыр авылында 16 декабрьдә төнге икеләр тирәсендә коточкыч фаҗига була. Икедән дүрт яшькә кадәрге сабыйлар янып үлә. Бу турыда «Башинформ» агентлыгы хәбәр итте.

Агентлык хәбәр иткәнчә, йорт хәрабәләре арасында тереләй янып үлгән өч бала мәете табыла. Төбәк буенча Тикшерү комитеты җинаять эше ача.

Башлангыч мәгълүматлар буенча, янгын чыкканда балалар үзләре генә була. Бу вакытта олылар өйдә булмый, дип сөйләгәннәр Башкортстан буенча Тикшерү комитетында.

Фаҗига урынында тикшерү эшләре башкаргач, судмедэкспертиза билгеләнгән. Аның нәтиҗәләре буенча йорт ни сәбәпле яна башлаганы һәм балалар нидән үлгәне билгеле булачак.

Шулай ук сабый балаларны ата-анасы ни сәбәпле караучысыз калдырганын да тикшерәләр.

«Башинформ» агентлыгының үз чыганагы хәбәр иткәнчә, балалар янгында үлгән вакытта, аларның аналары спиртлы эчемлекләр эчеп йөргән. Һәлак булган ике яшьлек малай һәм дүрт яшьлек кыз - бертуганнар, алар белән тагын дүрт яшьлек кыз була.