Күрше төбәктә 53 яшьлек ир-атны үз улы вәхшиләрчә үтереп, мәетен асып куйган
Бу кеше бавыры шартлау, эчке органнары имгәнү, кабыргалары сыну, эченә кан саву, тел астындагы сөяге сыну сәбәпле үлгән.
Башкортстанның Зиянчура районында 30 яшьлек ир-атны 53 яшьлек әтисен вәхшиләрчә үтерүдә шикләнеп тоткарлаганнар. Бу турыда «Комсомольская правда» сайты язды.
5 июньдә Зиянчура районындагы бер авылда 53 яшьлек ир-атның мәетен табалар. Ул асып куелган, маңгаенда зур яра була.
Хокук саклаучылар судмедэкспертиза ясагач, ир-атның «бавыры шартлау, эчке органнары имгәнү, кабыргалары сыну, эченә кан саву, тел астындагы сөяге сыну сәбәпле» үлүен ачыклаган. Бер сүз белән әйткәндә, ир-атны вәхшиләрчә җәзалап үтергәннәр.
Тиз арада бу җинаятьтә шикләнелүче кешене дә тоткарлыйлар. Ул мәрхүмнең 30 яшьлек улы, беркайда да эшләми. Җинаять коралы — боз ваткыч та табыла.
Сорау алганда, 30 яшьлек ир-ат гаебен таный. Әтисен ни сәбәпле шундый вәхшиләрчә җәзалаганын ул әйтмәгән. Тикшерү комитеты җинаять эше ачкан.