Күрше ир-атның эткә пычак кадаганын видеокүзәтү камерасы төшереп торган
Полиция хезмәткәрләре тикшерү эшләре башлаган.
Башкортстанның Стәрлетамак районындагы Наумовка авылында бер ир-ат күршесенең этенә пычак кадаган. Бу турыда «Башинформ» агентлыгы хәбәр итте.
Вакыйга 1 мартта була. Күрше ир-ат эткә хуҗасы каршында һөҗүм итә. Әлеге хәлне видеокүзәтү камерасы объективы төшереп тора, аннары кадрларны социаль челтәрләрдә тараталар.
Кадрларда капка төбендә йөргән этләр күренә, алар әллә уйнаша, әллә сугыша — аңлашылып та бетми. Шуннан соң каршы яктан ир-ат килгәне күренә, ул этләрнең берсенә суга.
Шаһитларның сүзләренчә, питбуль хуҗасы күрше этенә пычак кадаган. Шуңа кадәр ул күршесенә «Мин сине кисәткән идем», — дип кычкыра. Нинди кисәтү турында сүз барганы билгесез, күршеләр арасында ни булганын хәзер полиция хезмәткәрләре ачыклаячак.
«Дежур частька хәбәр иттеләр. Әлеге факт буенча тикшерү бара, видеокүзәтү язмасын өйрәнәләр», — дип сөйләгәннәр Башкортстан буенча Эчке эшләр министрлыгында.