Көрәш буенча дөнья чемпионы Казанда турнир вакытында сөйгәненә тәкъдим ясады - видео
Башкортстан көрәшчеләре Камилә Елисеева белән Артур Зөлкәрнәев өйләнешә.
11 декабрьдә Казандагы Көрәш сараенда көрәш буенча 18нче дөнья чемпионатының хатын-кызларны бүләкләү тантанасы булды. Билбаулы көрәш буенча ике тапкыр дөнья чемпионы Артур Зөлкәрнәев сөйгән кызы Камилә Елисеевага кияүгә чыгарга тәкъдим ясады. Бу турыда «Татар-информ» хәбәр итте.
Камилә Елисеева 52 килога кадәрге категориядә җиңде. Камилә дә, Артур да Башкортстан Республикасы данын яклый.
«Мин сөйгән кызым Камиләгә кияүгә чыгарга тәкъдим итәм», — диде Артур. Россия гимнын тыңлар алдыннан Камилә сөйгәненә ризалык биреп, «әйе» диде.
Халыкара турнирда дөньяның 35 иленнән 150 көрәшче катнаша.
