Көнче ир хатынын балта белән чабып үтергән һәм башын кисеп бәкегә ташлаган
Әтиләре әниләрен үтергән чакта ике бала мәктәптә булган.
Чувашиянең Алатырь шәһәрендә бер ир-ат хатынын балта белән чапкан, аннары мәетне тураклаган. Ул хатынның башын елгадагы бәкегә ташлаган. Хокук саклаучылар ир-атны тоткарлаган. Бу турыда Россия Тикшерү комитетының Чувашия буенча Тикшерү идарәсе хәбәр итә.
30 яшьлек хатын мәетен фатирда табалар. Аннары җинаятьтә шикләнеп аның ирен кулга алалар.
Тикшерү версиясе буенча, 22 декабрьдә иртән Алатырь шәһәрендә ир белән хатын талаша. Алар хатынның анасының фатирында була. Көнчелектән ярсыган ир-ат балта ала һәм хатынын чапкалый. Яраланган хатын урында ук үлә.
"Җинаять эзен яшерү өчен, ир-ат хатынның башын кисеп ала һәм бәкегә илтеп ташлый", диелә хәбәрдә.
Фаҗига вакытында ир белән хатынның ике баласы мәктәптә була. Ике бала да балигъ булмаган яшьтә. Хәзер алар әбиләрендә яши, диелә хәбәрдә.