Көнче егет сабый балаларның анасын гантель белән кыйнап үтергән

Австралиянең Мельбурн шәһәрендә яшәүче 29 яшьлек Кэтрин Хейли исемле хатынны сөйгән егете кыйнап үтергән. Хейлиның ике сабый баласы - алты яшьлек улы һәм унбер айлык кызы ятим калган. Бу турыда Mirror басмасына сылтама белән РЕН ТВ каналы хәбәр итте.

Яшь ана соңгы дүрт елда Шейн Робинсон исемле егет белән бергә яши. Хатын балаларын тәрбияләү өчен акча эшләргә тырыша. Ул өй тирәсендә генә урнашкан бер кафеда эшли башлый.  Эшкә урнашканнан соң, бергә яши торган егете хатыннан көнләшә. Ул барга килеп утыра, хатынның артыннан күзәтеп йөри. Робинсон фикеренчә, Хейли барга килгән ир-атлар белән шаярта, хезмәттәшләре белән дә якын мөнәсәбәткә керә.

Шуннан соң көнчелектән тәмам шашкан егет социаль челтәрләрдә ялган акаунтлар ясый, Хейлиның дусларына язып, төрле сораулар бирә. Ул хатынына челтәрдәге аккаунтларын бетерергә куша,  хезмәттәшләре белән аралашуны тыя.

Бу хәлләргә тәмам түзәрлеге калмагач, Кэтрин егете Шейнга аерылышырга тәкъдим итә, ул аннан китәргә теләвен әйтә. Әлеге сөйләшү хатын өчен фаҗига белән тәмамлана. Кэтрин урынга барып яткач, Шейн гантель ала һәм хатынның башына биш тапкыр суга. Имгәнгән хатын урында ук җан бирә, диелгән бу хәбәрдә.