Күл буенда ял иткәндә дүрт кеше утырган машина суга төшеп баткан
Өч яшьлек малай машинаны эшләтеп җибәрә һәм ике бала, ике олы кеше утырган машина бик тиз арада суга чума.
18 июньдә Чита шәһәрендә Кенон күле янында фаҗига була. Аның сәбәпләрен тикшерүчеләр ачыклый. Бу турыда Россия Тикшерү комитетының Байкал аръягы буенча Тикшерү идарәсенең матбугат хезмәте хәбәр итте.
Тикшерү версиясе буенча, сулык янында алты кешедән торган төркем ял итә. Аннары кичке җиделәр тирәсендә алар өйгә кайтырга җыена башлый, әйберләрен җыялар. Бу вакытта өч яшьлек малай BYD F3 машинасы руле артына кереп утыра. Ул автомобильне эшләтеп җибәрә. Машинада механик күчерү тартмасы була — ул кузгалып китә һәм суга төшә.
Бу вакытта машина салонында дүрт кеше була. Машина руле артында бер бала, арткы утыргычта тугыз яшьлек малай һәм тагын ике олы кеше утыра. Сулык тирән булу сәбәпле, машина шунда ук бата.
Шаһитлар балаларны коткара, өлкәннәрнең берсе үзе чыга. Кызганычка каршы, тагын бер ир-ат машинадан чыга алмый — ул батып үлә.
Тикшерү эшләре бара, диелгән бу хәбәрдә.
