Күгәрчен районында мичкә яккан чакта ике бала пешкән
Ике малай мунча миче янында янучан сыеклык белән шаярган.
Башкортстанның Күгәрчен районында ике баланың тәне пешкән. Аларны хастаханәгә салганнар. Бу турыда «Башинформ» хәбәр итте.
15 яшьлек үсмер һәм биш яшьлек малай мунча миченә ягарга җыена. Алар ут яга торган сыеклык белән уйнаша башлый.
«Балалар кызыксынучан бит, фантазияләре дә яхшы. Әгәр күңелсез булса, шаяру өчен ни дә булса уйлап табалар. Балаларның уеннары арасында шырпы шактый алдынгы урында тора. Мондый шаяруларның фаҗигале нәтиҗәләре белән коткаручылар шактый еш очраша», — дип сөйләгәннәр Башкортстанның Гадәттән тыш хәлләр буенча дәүләт комитетында.
Бәхетсезлек очрагы килеп чыкмасын өчен, түбәндәгеләрне истә тотыгыз:
- үзегез юкта балаларга шырпы һәм шәм тотарга рөхсәт итмәгез
- нәни балаларны эшли торган электр җиһазлары, камин, мич янында калдырмагыз
- шырпы, зажигалканы үзегез сатып алагыз
- үзегез дә дөрес булмаган гамәлләр башкармагыз
- гадәттән тыш хәлләр хезмәтләренең телефон номерларын үзегез дә белегез, балаларга да яттан өйрәтегез