Көчле давыл вакытында бер сыер агач башына асылынып калган
Давыл вакытында җил тизлеге секундына 49 метр була.
Американың Луизиана штатында «Ида» давылы вакытында бер сыер агач башында асылынып калган. Җил агачка менгереп куйган сыерны алу өчен махсус коткару операциясе уздырырга туры килгән. Бу турыда РЕН ТВ хәбәр итте.
Сыерны коткаруда Тайлер Акоста, Дэвид Палмер, Рой Раган һәм Луи Помес исемле кешеләр катнашкан. Алар сыерны җиргә төшерү өчен бензин пычкылары файдаланган. Агач ботакларын кискәләгәннәр, аннары акрын гына сыерны җиргә төшергәннәр.
«Ида» давылы Атлантик океанда формалаша. Аңа биш категориянең дүртенчесен бирәләр. «Ида» якшәмбе көнне Луизиана штатына килеп җитә. Давыл вакытында җил тизлеге секундына 49 метр була. Җил төньяк-көнбатыш юнәлештә сәгатенә 16 километр чамасы тизлектә исә, диелә хәбәрдә.