Бәрәңге, макарон яки ярмадан пешерелгән ризыклар янына иттән әзерләнгән тәмле гуляш рецепты.
Кирәкле ингредиентлар: 1 кг ит, 2 баш суган, 1 кишер, 3 тырнак сарымсак, 3-4 аш кашыгы көнбагыш мае, 200 г томат пастасы, 200 мл су, 50 мл 10-18 процентлы сөт өсте (сливки), 3 аш кашыгы он, тәменчә тоз һәм борыч, 1 аш кашыгы паприка.
Итне шакмаклап турарга. Аерым савытта он, тоз, борыч һәм паприканы кушарга да шунда ит кисәкләрен әвәләп алырга.
Табага 3-4 аш кашыгы көнбагыш мае салып, онда әвәләнгән ит кисәкләрен кызарганчы кыздырырга. Аннары иткә туралган суган, сарымсак, кишер өстәп, 5-10 минут томалап пешерергә. Шуннан соң томат пастасы, су салып һәм вакыт-вакыт болгатып, талгын утта 1 сәгать томалап пешереп бетерергә.
Әзер гуляшка сөт өсте һәм туралган петрушка, укроп кебек тәмләткеч үләннәр салып болгатып, газны сүндерергә.