Итальян егете Даниэле бик җиңел әзерләнә торган «Маргарита» пиццасын пешерә – видео

Итальян егете Даниэле Казандагы пиццериясендә итальян рецепты буенча «Маргарита» пиццасын пешереп күрсәтте. «Интертат» хәбәрчесе пиццадан авыз итеп карады һәм бик ошатты.

Моның өчен: камыр, томат пастасы, базилик һәм сыр кирәк.

Даниэле әзер камырны уклаусыз кулы белән генә җәйде. «Камырның рецепты сер булып калсын», – ди пешекче.

Италиядә пицца өчен камыр әзерләүнең стандарт рецепты бар: иләктән чыгартылган он, диңгез тозы, зәйтүн мае һәм кайнаган су. Шуларны бергә кушып, камыр җәябез.

1. Камырны юка итеп җәябез.
2. Камыр өстенә томат пастасын таратып чыгабыз.
3. Тигез итеп угычтан чыгартылган сыр сибәбез.
4. Өстенә базилик сибәбез.
5. Пиццаны 250 С градуска кадәр кызган мичтә яки духовкада пешерәбез. «10-15 минут җитә», – ди Даниэле.

Ашларыгыз тәмле булсын! Buon appetito!