Россия Цифрлы үсеш министрлыгы IT-белгечләргә ташламалы ипотека бирү кагыйдәләренә үзгәрешләр кертергә тәкъдим итте. Бу турыда ведомствога сылтама белән РЕН ТВ хәбәр итте.
Министрлык белешмәсе буенча, яңа кагыйдәләр аккредитация булган барлык IT-компания белгечләренә ташламалы ипотека бирүне күздә тота.
«Шулай ук хезмәткәрнең кеременә карата таләпләр киметелә, максималь яшь арттырыла. Эшкә урнашуга карата шартлар да гадиләштерелә», – диелә хәбәрдә.
Мөһим үзгәрешләр арасында – белгечнең яше. Ул 18 дән 50 яшькә кадәр киңәйтелә. Моңа кадәр ул 22 дән 44 яшькә кадәр иде.
Ипотека кредиты алгач, белгеч аккредитацияләнгән компаниядә 5 ел эшләргә тиеш. Моңа кадәр айтишник кредит срогы беткәнче бу компаниядә эшләргә тиеш иде, диелә хәбәрдә.
