Ислам динендә пластик операция кайсы очракта тыела һәм рөхсәт ителә?

«Минем бер иренем икенчесенә караганда зуррак. Шул сәбәпле үземне уңайсыз хис итәм һәм, миңа калса, бу минем иремә дә ошамый, гәрчә ул бу хакта миңа ачыктан-ачык әйтмәсә дә. Башка бернәрсәгә дә кагылмыйча, миңа иренемнең формасын төзәтү өчен операция ясатырга ярыймы?» — дип сорый бер укучы.

Җавапта «әйе, сез иреннәрне бер үк үлчәмдә итеп, аларның формасын төзәттерә аласыз», диелә һәм тәфсилләп аңлатма бирелә.

Пластик операцияләр мәсьәләсендә гомуми кагыйдә түбәндәгечә: әгәр мондый операция тышкы кыяфәт дефектын (тумыштан булган яки яшәү дәверендә барлыкка килгән дефектын) бетерү өчен эшләнсә, бу рөхсәт ителә.

Әгәр дә операция болай да дефектлы булмаган кыяфәтне төзәтү яки бизәү өчен эшләнсә, бу Аллаһы яралткан, бар кылган нәрсәне, ягъни кешенең табигыйлеген үзгәртү дип санала һәм моны эшләү тыела.

Бу мәсьәләдә нигез булып тумыштан килгән дефектны бетерүнең рөхсәт ителгәнлеге турында хәнәфи мәзһәбе фәтвасы тора. «Фәтава әл-Һиндийә» китабында болай диелгән: «Әгәр кем дә булса артык бармагын кисеп алырга яки башка нәрсәне [тумыштан килгән дефектны төзәтергә] теләсә, Нусайр, Аллаһы аннан разый булсын, болай дигән: «Әгәр мондый гамәлләрдән соң кисүчеләр еш үлсә, моны эшләргә ярамый, ә киресенчә ешрак уңай тәмамланса — болай эшләргә мөмкин» (5/360).

Мөфти Мөхәммәд Такый Усмани «Тәкъмилә Фәтх әл-мүлхим» китабында болай дип ачыклык кертә: ⠀«Артык бармакны һәм шуңа охшаш башка физик җитешсезлекне бетерүгә килгәндә, бу Аллаһы Тәгалә бар кылган әйберләрне үзгәртү дип саналмый, бәлки җитешсезлекне бетерү яки авыруны дәвалау дип атала» (5/116).