![Искәндәр Биктаһировның хастаханәдә җырлаган видеосы чыкты](https://intertat.tatar/resize/shd/images/uploads/news/2023/12/26/bea27bdfda60aa540ee3b3a350a8599e.jpg)
Мессенджерларда Искәндәр Биктаһировның хастаханәдә җырлаган видеосы таралды. Видео җырчының хастаханәдән чыккан көнендә һәм җырлап бетергәндә төшерелә башлаган. Видео төшерүче «ай, молодец» дип кабатлап тора.
Җырчыны хастаханәдән озатырга палатадагылар барысы да коридорга чыккан. «Ходай ярдәм бирсен», – дип, авыручыларга изге теләкләрен тели җырчы коридор буйлап атлап.
Шул вакытта коридор буйлап тезелеп баскан өлкәннәр халык артисты белән сөйләшеп калырга тырыша.
– Без фамилиядәшләр. Бәлки, без – туганнардыр?
– Кит аннан… Кайсы районнан?
– Чистайдан.
– Мин Чирмешәнский.
– Тагын бер җыр җырлагыз инде.
– Монда ярамый.
– Ярый, дәва гына була.
– Монда алай итеп йөрергә ярамый бит, хәзер аска шалтыраталар, аннары бөтенләй чыгармыйлар.
– Тагын берне җырламыйча җибәрмибез.
Авыручылар белән шушы диалогтан соң, Искәндәр Биктаһиров «Кашыңның каралары» җырын сузып җибәрә.
Аннары ул «терелегез, җырым дәва булсын» дип китеп бара.
Татарстанның халык артисты Искәндәр Биктаһиров 24 декабрь көнне 72 яшендә вафат булды.