Исерек ата 11 яшьлек улын балта белән чабып үтергән

Петербургта 43 яшьлек ир-атны тоткарлаганнар. Ул баласын үтергән дип шикләнәләр. Бу турыда «Росбалт» сайтына Петербург буенча Тикшерү комитетында сөйләгәннәр.

2 октябрьдә бу ир-ат исерек булган. Ул Нарва проспектындагы фатирда 11 яшьлек улының башына күп тапкыр балта белән суккан. Малай урында ук җан биргән. Ата кешенең баласын вәхшиләрчә кыйнау сәбәпләре әлегә билгеле түгел.

Хәзерге вакытта бу ир-атка карата гаепләү белдерү турында сорау хәл ителә. Тикшерү эшләре бара.