«Исемне улыбыз сайлады» - Ләйсән Таишева кечкенә кызын күрсәтте
Ләйсән Таишева 12 ноябрь көнендә икенче тапкыр әни булды. Алар тормыш иптәше белән уллары Ролан һәм кызлары Эмманы үстерәләр. Күптән түгел яшь әни Инстаграмда кечкенә кызы белән төшкән фотоны урнаштырды.
«Эмма! Минем тәмле кәнфитем. Исемне улыбыз Ролан сайлады. Без исемнәр сайлап, укып утырганда ишетеп калган. „Минем Эмма“. Башка вариантларны ул гомумән кабул итмәде… Менә шулай безнең Эмма туды», — дип язган Ләйсән Таишева.
Күпләр бәләкәчнең исеме әбисе Римма Ибраһимованың исеменә яңгыраш дигән фикердә: «Мин Римма исеменә охшатып сайлагансыз дип уйладым», «Әниегезнең исеменә туры китереп сайлагансыз дип уйлаган идем, бик матур исем, сөеп, тигезлектә үстерегез».
«Борыны нәкъ синекенә охшаган, туры борын», «Бәхетле бул, бала!» — дип матур теләкләрен җиткергәннәр инстачылар.