«Исән, ярдәмне үзе чакырды». Парковкада талашканда, бер ир-атның башына сәнәк кадаганнар
Новосибирск өлкәсендә 52 яшьлек ир-атның башына сәнәк кадаганнар. Бу турыда «Вести» каналы хәбәр итте.
Фаҗига Новосибирск шәһәренең Калинин районында парковкада була. Машина йөртүчеләр ни өчен талашканы әлегә билгесез. Җинаятьче ир-ат сәнәкне корбанының башына ыргыткан. Имгәнгән ир-ат ярдәмне үзенә үзе чакыра алган, диелә хәбәрдә.
Әлеге хәлне видеокүзәтү камерасы да төшереп торган. Кадрлар социаль челтәрләрдә таралган. Анда җирдә ятучы ир-атка башка бер ир-ат һөҗүм итү сурәтләнә. Ул корбанына күп тапкыр суга.
Моны күреп алган башка ир-ат кыйнауны беразга туктатып тора ала. Ләкин җинаятьче кабат килә һәм корбанына берничә тапкыр сәнәк белән кадый. Шуннан соң сәнәк имгәнгән ир-атның башына кадалып кала, диелә бу хәбәрдә.
Табиблар сәнәкне ир-атны башыннан алу җаен таба. Операция берничә сәгать дәвам итә. Якынча белешмә буенча, хирурглар сәнәкне берничә кисәккә кисеп ала.
Һөҗүм итүче ир-атны тоткарлаганнар, җинаять эше ачылган, диелә хәбәрдә.