Кичә иртәнге 8 сәгать тирәсендә Мәскәү өлкәсендә авариядә хатын-кыз һәм бала һәлак булган. Якынча белешмә буенча, тагын 10 кеше имгәнгән. Бу турыда Мәскәү өлкәсе прокуратурасы телеграм-каналында хәбәр ителә.
Фаҗига М-12 трассасында була. Биредә берничә машина бәрелешә. Тикшерү бара, диелә хәбәрдә.
РЕН ТВ белешмәсе буенча, микроавтобус йөртүчесен тоткарлаганнар. Биредә «Mercedes-Benz Sprinter 2» микроавтобусы «Lada Largus» машинасына, аннары «Audi» машинасына бәрелгән. Авариядә 2 кеше урында ук үлгән. 8 кешене хастаханәгә илткәннәр, диелә.
https://kazanfirst.ru белешмәсе буенча, һәлак булучылар ана белән аның 9 яшьлек баласы булган. Авариядән соң хатын әле исән була, аннан кан ага, үзе узып баручылардан баласын коткаруны сорый. Малайны салоннан атасы тартып чыгарган, ләкин коткара алмаган. Әни кеше «ашыгыч ярдәм» машинасында үлгән. Микроавтобуста тагын 3 бала булган. Алар хастаханәдә, диелә хәбәрдә.