«Ирония судьбы» татарча: Марат Яруллин, Асылкаеваны ташлап, Ильмира Нәгыймовага китә

Татар эстрадасы артистлары катнашында «Ирония судьбы, или С легким паром» фильмының татарча версиясе чыкты. 20 минутлык «Әллә язмыш, әллә ялгыш» фильмының сценарий авторы – Альберт Шакиров, режиссеры – Марсель Махмутов.

Яңа ел төнендә Марат Яруллин әнисенә (рольне Маратның әнисе Рафия Яруллина уйный) өйләнергә җыенган кызы Заринаны алып кайтып күрсәтергә вәгъдә бирә. Әмма, традиция буенча, дуслары белән мунчага китеп бара, Данир Сабиров һәм башка сәхнәдәшләре белән Яңа ел кичен «шәп» итеп башлаганнан соң, ялгыш кына Чаллыга, Ильмира Нәгыймова фатирына килеп эләгә. Ә Нәгыймова аннан алда гына сөйгәне Габделфәриткә (Ринат Яруллин) Марат Яруллин концертына барасы килүен әйткән була. Һәм менә сиңа көтелмәгән сюрприз – аягында да басып тора алмаган, исерек Марат Яруллин фанаткасының фатирына үзе үк килеп керә.

Алга таба вакыйгалар нәкъ фильмдагыча дәвам итә. Кинәт кайтып кергән Габделфәрит Ильмира белән Маратны бергә күреп, тавыш чыгара. Маратны өйдә әнисе белән сөйгәне Зарина Асылкаева көтә. Ә Марат Яңа елны, ялгыш кына очраткан Ильмирасы белән, Чаллыда каршылый.