3 яшькә кадәрге бала тәрбияләүче әти кешеләргә балага гына түгел, үзенә дә алимент таләп итү хокукы бирелә. Хатын баласын караучы иренә акча түләргә тиеш була. Шундый законны 31 июльдә Россия Президенты Владимир Путин имзалады. Бу турыда «Парламентская газета»га сылтама белән «Челнинские известия» хәбәр итте.
Моңа кадәр бары тик баланың анасы гына алимент таләп итә ала иде. Никахта яшәгәндә дә, аерылышкач та, хатынның судка бирү хокукы бар.
Мондый законны Архангельск өлкә җыены тәкъдим иткән. Андагы депутатлар барысы да, алиментлар буенча законнарны кабат карау кирәк, дип санаган. Депутатлар фикеренчә, намуссыз аналар кайсыбер очракта алимент акчасына яхшы гына яши, ә баласын карамый, диелә хәбәрдә.
