Иркәгә Башкортстанның атказанган артисты исеме бирелгән
Мактаулы исемне җырчыга Башкортстан башлыгы үзе тапшырган.
Җырчы Иркәгә «Башкортостанның атказанган артисты» дигән мактаулы исем бирелгән. Аны җырчыга Башкортстан башлыгы Радий Хәбиров тапшырган. Җырчы сөенече белән инстаграмда уртаклаша.
«Гади авыл кызы «Башкортостанның атказанган артисты» исеменә лаек дип табылган көн бүген. Әлеге зур исемне Башкортостан башлыгы кулыннан алу үзе бер дәрәҗә.
Елыйм. Күңелдә чиксез рәхмәт хисе. Хөрмәтегез һәм зур бәягез өчен рәхмәт! Рәхмәт сезгә, тамашачым! Рәхмәт Башкортстан җитәкчелегенә, Башкортстанның мәдәният министрлыгына!
Минем зур терәгем — гаиләмә, тугры дусларыма, төркемемә, продюссерым Динә Гәрәевага рәхмәт!
Эшеңне күреп бәяләүләре иң югары дәрәҗә.
Без — ике тугандаш халык, телебез охшаш, җырларыбыз бер, моңыбыз — үзгә! Һәрчак дус, тату яшик, бергә булганда — без көчле», — дип язып куйган ул.
Иркәне сәхнәдәш дуслары Элвин Грей, Филүс Каһиров, Динә Гәрәева, Римма Никитина, Марат Шәйбәков, Әбри Хәбриев, Эльмира Сөләймановалар котлаган. «Соңгысы булмасын, халык артисты исемен дә алырга язсын», — дигәннәр.