Португалия футболчысы Криштиану Роналдуны 99 тапкыр камчы белән суктырырга мөмкиннәр, дип хәбәр итә Rouydad24 басмасы.
«Әл-Наср» клубы өчен чыгыш ясаучы футболчы 19 сентябрьдә Иранга килгән һәм җирле «Персеполис» клубы белән уенда катнашкан. Матч алдыннан Роналду җанатарлары белән очраша, анда Фатыйма исемле мөмкинлекләре чикләнгән рәссам кыз да килә. Футболчы очрашу вакытында кызны кочаклый һәм яулык бәйләгән башыннан үбеп ала.
Басма язуынча, Иран җинаять кодексы буенча, бу – «зина» дип бәяләнә. Әлегә җинаять эше кузгатылмаган, дип яза басма. Шул ук вакытта икенче басма – Index HR язуынча, Иран суды, читтән торып, җәза турында карар кабул иткән. Әгәр Роналду тагын Иранга килсә, аңа 99 тапкыр камчы төшәргә мөмкин.
