Краснодар краеның Высокий бистәсендә 29 ноябрьгә каршы төндә күп балалы гаилә янгында һәлак булган. Биредә 4 бала һәм 2 өлкән кеше үлгән. Бу турыда «Комсомольская правда» хәбәр итте.
Высокий бистәсендә шәхси йортта янгын турында 29 ноябрьдә 01.55 сәгатьтә хәбәр итәләр. Урынга янгын сүндерүчеләр килгәндә, йорт тулысынча ут эчендә була. Янгынны 03.12 сәгатьтә сүндереп бетерәләр. Хәрабәләрне актарганда, 6 мәет табыла. Аларның дүртесе балалар була. Бу турыда Россия Гадәттән тыш хәлләр министрлыгының Краснодар крае буенча идарәсе матбугат хезмәтендә хәбәр итәләр.
Янгын сәбәпләрен белгечләр ачыклый. Тикшерү комитеты җинаять эше ачкан.
«Өйдә 1990 һәм 1991 елда туган ир белән хатын, аларның 2 дән 11 яшькә кадәрге балалары яши. Күршеләре янгын күргәч, экстрен хезмәтләргә хәбәр итә. Янгынны сүндергәч, 6 мәет табыла. Гаилә яхшылар рәтендә, бернинди хисапларда тормый», – диелә Тикшерү комитеты хәбәрендә.
«Комсомольская правда» белешмәсе буенча, мәрхүм иргә 32, хатынга 33 яшь булган. «Әтиләре колхозда эшләде, әниләре балалар үстерде. Исерек килеш күргәнем булмады. Өй арендалап яшиләр иде, гадәти гаилә», – ди күршеләре.
Мәрхүм малайларның икесе 3 һәм 5 нче сыйныфта укый, калган икесе балалар бакчасына йөри. Якынча белешмә буенча, гаилә газ исенә агуланып үлгән, янгын аннары гына башланган, диелә хәбәрдә.