Ир белән хатын өч сабый баласын ярты ел буена ач тоткан

Томск өлкәсенең Колпашевский районында яшәүче ир белән хатынны ата-ана хокукыннан мәхрүм иткәннәр. Бу кешеләр өч сабый баласын ярты ел буена туйганчы ашатмаган, юындырмаган, табибларга алып бармаган. Ир белән хатынны мәҗбүри эшләргә җибәргәннәр. Бу турыда Томск басмасы яза.

23 яшьлек хатынны һәм 33 яшьлек ирне «балигъ булмаган баланы тәрбияләү буенча вазифаларын үтәмәү, балигъ булмаган балага карата кырыс мөнәсәбәт» маддәсе буенча хөкем иткәннәр.

«Хөкем ителүче ир белән хатынның җиде, дүрт яшьлек һәм әле яңа туган (2012, 2015, 2018 елда туган) өч баласы була. Ата белән ана 2018 елның 12 июненнән 12 декабрьгә кадәр балаларын туйганчы ашатмаган, юындырмаган, табибларга алып бармаган», — дип сөйләгәннәр Томск өлкәсе прокуратурасында.

Прокуратура мәгълүматы буенча, сабый балалары янында ир белән хатын спиртлы эчемлекләр кулланган. Фатир әшәке, җыештырылмаган булган. Ата белән ана балаларны караучысыз һәм ризыксыз үзләрен генә калдырып киткән.

Ир белән хатын үз гаебен тулысынча таныган. Суд карары буенча, ир белән хатын һәрберсе 280 сәг мәҗбүри эшкә барырга тиеш.