Ипотекасын ябарга дип, банкоматка бер миллион сум салган ир-ат акчасын югалткан
![Ипотекасын ябарга дип, банкоматка бер миллион сум салган ир-ат акчасын югалткан](https://intertat.tatar/resize/shd/images/uploads/news/2023/11/13/dc358445f1945f919ab62871934a751e.jpg)
Мәскәүдә 11 ноябрь көнне бер ир-ат «Альфа-банк» банкоматына, ипотекасын ябарга дип, 2 миллион сумга якын акча салган һәм акча счетка керү яки кермәвен тикшермичә генә китеп барган. Ул киткәч, аппарат купюраларны кире чыгарган һәм аларны банкоматка чиратта торган кеше алып киткән.
Банкомат башта максималь сумма – 1 миллион сумны гына кабул иткән, аның белән проблема чыкмаган. Ә икенче миллионны Владимир банкоматның акча кабул итә торган урынына салган һәм китеп барган.
5 минуттан ир-атка смс килгән, анда барлык акчаның да счетка кермәвен хәбәр иткәннәр. Ул киредән банкоматка йөгерә, әмма миллион сум инде башка кешедә була.
Ир-атка полициягә мөрәҗәгать итәргә туры килә. Аның бәхетенә, яңа «миллионер»ның эзенә тиз төшкәннәр.