Ипотекасы түләнеп бетмәгән фатирны сатып буламы?

Риэлторлар сүзләренчә, ипотекасы түләнеп бетмәгән фатирны сату мөмкинлеге бар. Бу турыда «Челнинские известия» хәбәр итте.

Александр Тукай районыннан Чаллыга күченеп килгән. Ул ике бүлмәле фатирны ипотекага алган һәм биредә озак яшәргә җыенган. Тик аны Түбән Камага эшкә күчергәннәр. Милекне тиз арада сатарга туры килә. Аның ипотеканы түләп бетерү яки башка шәһәрдә фатир арендалаган килеш ипотекасын да түләп тору мөмкинлеге булмый. 

«Ипотека бурычы яки коммуналь түләүләр буенча әҗәте булган фатирны сату алай уку катлаулы процедура түгел. Банкротлык стадиясендә булган кешеләрнең милеген сату кыенрак. Бу очракта документларны рәсмиләштергәндә куркынычлар була. Бурычлы фатирлар 10-15 процентка кимрәк бәядән сатуга куела, шуңа күрә кыска вакыт эчендә сатып алучы табу кыен түгел», — дип аңлаткан Александрга күчемсез милек буенча белгеч Дмитрий Абушахманов.

Людмила ипотекасының яртысын түләп бетергән, ләкин кризиста аның даими кереме беткән. «Шул ук вакытта компаниямдә хезмәткәрләрем каршында финанс бурычларым, шәһәр үзәгендә өч бүлмәле фатир өчен түләүләрем дә барлыкка килде. Бу фатир өчен мин ай саен банкка 65 мең сум түлим. Аны тиз генә сатарга кирәк дип таптым», — дип сөйли Людмила. Шуннан соң ул ипотекалы фатирын сатып, кечерәк фатир алган. 

«Мондый очраклар шактый. Иң яхшысы — ипотеканы түбәнрәк процентка рефинанслау ясарга яки фатирны сатып, кечерәген алырга. Саткан акчага бәйле рәвештә, яңа торакның агымдагы айлык түләүләре кимрәк булырга, яки ипотекалы фатирны саткач, бөтенләй ипотекасыз яңа фатир алырга була», — ди эксперт.

Банкта залогта булган фатирны сату-алу килешүе буенча, яңа хуҗага башта банктагы әҗәтне тулысынча капларга кирәк була, калган сумманы ул сатучыга күчерә, диелә бу хәбәрдә.