Хәзер ипотеканы түләп бетергәнче үк балаларга фатирдан өлеш бүлеп биреп була. Бу турыда «Челнинские известия» яза.
Ана капиталын кулланган очракта, ипотекага алынган милеккә хокукны барлык гаилә әгъзаларына, шул исәптән балаларга да теркәүне банк белән исәп-хисап ясап бетергәнче үк эшләргә була.
Торак ипотекага алынган булса, өлешләр бүлеп бирү процессы, гадәттә, банкка акчаны түләп бетергәч ярты ел эчендә башкарыла. Ләкин билгеле бер кагыйдәләрне үтәгән вакытта, кредит түләнеп беткәнче үк өлеш бүлеп биреп була.
Татарстан буенча Росреестр җитәкчесе урынбасары Лилия Борһанова сүзләренчә, моның өчен тиешле килешүне төзергә кирәк. Килешү төзү өчен залог хуҗасы ризалыгы булырга тиеш. Башкача әйткәндә, банк ризалык бирергә тиеш.
Экспертлар сүзләренчә, әлеге яңалык килешү төзүне гадиләштерә һәм торак шартларын яхшырту өчен ана капиталы кулланырга теләгән күп гаиләләргә ярдәм итә. Эш шунда – ипотека түләнеп беткәнче өлеш бүлеп бирү мөмкинлеге булмау күчемсез милекне сатканда кыенлыклар тудыра, заемчыга башта ипотеканы түләп бетерү өчен акча табарга, аннары бөтен гаиләсенә өлешләр бүлеп бирергә, аннары гына объектны сатарга рөхсәт ителә.
Банклар ышандырганча, мондый тәҗрибә бар һәм аның өчен ипотека кредиты офисына килергә яки шәхси кабинет аша мөрәҗәгать итәргә була, диелә хәбәрдә.