«Йөзе чалшаерга мөмкин иде» – мина кыйпылчыгы кадалган хәрбигә табиблар операция ясады
Татарстаннан махсус операциядә катнашучы бик күп авыр җәрәхәтләр ала, шулай да сугышчы исән кала, яраланган хәлдә ул бер тәүлек гаражда ята, командиры аны балалар коляскасында алып чыга һәм госпитальгә озата. Ир күрми башлый, ә битендә зур мина кыйпылчыгы кала. РКХ табиблары, катлаулы операция ясап, кыйпылчыкны уңышлы чыгаруга ирешә.
«Мина куелган ватык мотоциклга бәрелдем»
Бөгелмәдә яшәүче Андрей контрактка кул куеп, махсус операция зонасына 2024 елның июлендә китә. Ул махсус операциягә элегрәк тә китәргә теләгән, әмма соңгы елларда абыйсы белән бергә төньякта вахта ысулы белән эшләү сәбәпле, бу адымга бармый торган. Июль аенда Андрей хатыны белән җитди ачуланыша, шуннан соң хәлиткеч карар кабул итә.
«Без, мөгаен, күп ата-аналар кебек үк каршы идек. Тик ул хатыны белән талашкан һәм контрактка кул куйган. Нибары өч көн әзерлек, һәм аларны инде фронтка җибәрделәр», – дип сөйли сугышчының әтисе.
«Лентасы артында» Андрей «Электроник» хәрби кушаматын ала һәм БМП-3 экипажының механик-йөртүчесе була. Аның бригадасы Авдеевск юнәлешендә эшли. «Электроник» өчен 16нчы булган хәрби бирем вакытында берничә экипаж урман полосасын ала. Андрейны ул биремгә ялгыш җибәрәләр – иптәше авырып китә, аны алыштырырга туры килә.
«Без биремне үтәп, артка чигенә башлаган идек. Гараж янында өч FPV-дрон пәйда булды. Чигенгән арада рульне читкә тарттым һәм мина куелган ватык мотоциклга барып бәрелдем», – дип искә ала сугышчы.
Машина минада шартлап, әйләнеп капланган. Командир белән наводчик зыян күрмәгән. Андрейның аягындагы бармагы өзелә, табан асты пешә, бер күзен югалта, икенчесе күрми башлый. «Электроник» сүзләренчә, ул көч-хәл белән шуышып бара. Ул вакытта дошман сугышчыга «кассеталар» белән һөҗүм итә башлый.
«Мин бетон плитә астына качып өлгердем һәм һөҗүм басылганын көттем. Бертуктамый кыйпылчыклар очып торды. Барысы да беткәч, минем арттан командир йөгереп килде, ләкин мине ялгызы гына эвакуацияли алмады, иптәшләр артыннан китте. Бер тәүлекне мин гаражда үткәрдем – мине күчерү мөмкинлеге юк иде. Икенче көнне командир иске балалар коляскасын тапты, бөтен өстен кисеп, мине коляскага салды, һәм мине 2 километр тартып бардылар. Аннан инде машина белән Авдеевкага илттеләр һәм медикларга тапшырдылар», – ди Андрей.
Фото: © РКХ матбугат хезмәте
«Кыйпылчыкны алдык – мондый операцияләр куркыныч, янындагы бит нервысына тияргә мөмкин иде»
Сугышчыга беренче ярдәмне Авдеевкадагы медиклар күрсәтә, шуннан соң Луганскига госпитальгә алып китәләр, аннан Донецкка күчерәләр, аннан – Ростовка, аннан – Санкт-Петербургка.
«Җәрәхәтләремне дәваладылар һәм башымнан бик күп кыйпылчыклар чыгардылар. Бу – беренче этап иде. Йөздә калган кыйпылчыкларны икенче этапка – планлы этапка калдырдылар. Бөлгелмәгә кайткач, яңагым шешеп чыкты, авыз ачылмады диярлек – шулкадәр зур шеш иде», – дип сөйли «Электроник».
Әтисе Андрейны Татарстан Республикасы клиник хастаханәсенең кабул итү бүлмәсенә алып килгән.
«Пациентка краниопластика ясалды, кыйпылчык алынды, чәйнәү функциясе кайтарылды, авырту синдромы бетерелде. Мондый операцияләр куркыныч, чөнки якыннан уза торган бит нервысына тияргә мөмкин. Ул чагында бөтен йөз чалшаерга мөмкин. Безнең очракта барысы да план буенча узды», – дип сөйләде Республика клиник хастаханәсенең теш казнасы-йөз хирургы Райнур Мөхәммәтҗанов.
Табиблар Андрейның яңагыннан якынча 3х4 сантиметр зурлыктагы кыйпылчык чыгарган. Барысы да уңышлы узган, берничә көннән ир-атны өенә кайтарып җибәргәннәр. Якын арада «Электроник» күрү сәләтен кайтарырга планлаштыра: Уфа белгечләре, бер күзе барыбер күрәчәк, дип өметләндергән.
Ә күптән түгел Андрей командирдан «Электроник» белән шул ук хәрби биремне үтәргә барган экипаждагыларның барысы да һәлак булганлыгын белгән. Исән калучылар арасында – ул, аның командиры һәм наводчик.
Сүз уңаеннан, хатыны, иренең сукырайганын белгәч, аның белән аерылышкан. Әмма Андрей төшенкелеккә бирелми, аның 5 яшьлек улы бар, аның өчен яшәячәк.